Ukiut marluk ingerlanerini ingerlariaqqiffiusumik ilinniakkamik aallartitsisartut ikinnerusut
Ilinniarnertuunngorniarneq ilinniaqqinnissamut pingaartumik ingerlariaqqiffiusumik ilinniakkanut, soorlu ingerlariaqqiffiusumik ilinniakkanut naatsunut-, bachelorinngorniarnernut,- professionsbachelorinngorniarnernut aammalu kandidatinngorniarnernut piareersaataasoq. Kisitsisini paasissutissani matumani ilinniarnertuunngorniarnermi ukiunik pingasunik sivisussuseqartumi nalunaarsuutit kisimik ilanngunneqarput.
Ukiuni kingullerni tulleriinni ilinniarnertuunngorniarnermiit ingerlariaqqiffiusumik ilinniakkamik aallartitsisartut amerlassusaat appariartuaarsimavoq. 2015-imi ilinniartut akornanni 38 procentii ukiut marluk ingerlanerini ingerlariaqqiffiusumik ilinniakkamut ingerlaqqissimapput. 2010-mi ilinniartunut sanilliullugu tamanna 30 procentpointinik appariarneruvoq, tassani ilinniartut 68 procentii ukiut marluk ingerlanerini ingerlariaqqiffiusumik ilinniakkamik aallartitsisimammata.
Inuussutissarsiornermilli ilinniakkanut ingerlaqqittartut amerlassusaat 2010-mi 9 procentimiit 2015-imi 20 procentimut qaffassimavoq. 2010-mi 2015-imilu ilinniarnertuunngorsimasut ukiullu marluk ingerlanerini ingerlariaqqiffiusumik ilinniakkamik imaluunniit inuussutissarsiornermik ilinniakkamik aallartitsisimasut katillugit amerlassusaat 77 procentimiik 57-procentimut apparsimavoq.
Titartagaq 1. 2010-miit 2015-imut ilinniarnertuut ukiut marluk ingerlanerini ingerlariaqqiffiusumik ilinniakkamik imaluunniit inuussutissarsiornermik ilinniakkamik aallartitsisimasut amerlassusaat
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDTRGU1).
Ingerlariaqqiffiusumik ilinniakkani aallartittartut amerlassusiisa appariarnerat ilinniarnertuut amerlassusaannut naleqqiullugu isigineqassaaq. Piffissami 2010-miit 2014-imut ilinniarnertuunngoreernermi ukiut marluk ingerlanerini ingerlariaqqiffiusumik ilinniakkanut ingerlaqqittartut amerlassusaat allanngorarsimanngilaq. Piffissami pineqartumi ilinniarnertuunngorniarnermik ukiunik pingasunik sivisussuseqartumik naammassinnissimasut amerlassusaat 56 procentinik qaffassimagaluartoq. Imaappoq ilinniarnertuut amerlassusaat qaffangaatsiarsimagaluartoq amerlanerusut ingerlariaqqiffiusumik ilinniakkamik aallartitsisimanngillat.
Titartagaq 2. 2010-miit 2015-imut ilinniarnertuut amerlassusaat
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDTRGU1).